牛年第一大事就梗係菜鳥既婚禮啦, 2月14日, 好浪漫呢!

跟住就係4月30日的會計專業試, 呢次一定唔衰得, 我年紀唔細了,再拖落去, 唔得了呢!

工作方面, 喺呢個巿道, 我公司已裁員了, 幸好我無影響, 悻存的都要減薪, 放完農曆假返工前一晚,我喺屋企講, (好慘, 聽日又要返工), 二佬就話:有份工你返咪好囉!

又係既~~~~

但AR TEAM嗰便有個女同事自己辭職走, 因為佢頂唔順佢個變態阿姐,唉~~~我都好明白佢心情!

話說呢位阿姐下面有位女同事,懷了五個月身孕(唔係要辭職嗰位), 阿姐叫呢位孕婦走入又窄又多雜物喺地下既儲物櫃搵文件, 仲要係搵幾份,當然, 可能大家都覺得無問題, 但如果人地有咩事, 咁點算? 佢有無考慮過嗰度既環境?!

要走既女同事,唔係因一, 兩件小事要走, 係一路都做得唔開心,佢話"寧食開眉粥, 莫食愁眉飯", 呢句我都好認同!

但公司話唔請人喎, 人手咁短絀, 聽講, 會叫另一名同事接手先,等孕婦放完產假,再接返, 即係話, 呢個孕婦放完產假要做兩個人既野! 唉~~~即係趕人走啫!

我收到風話原來個變態阿姐都有考慮過掉我去幫手,但諗一來我已勁OT, 二兩我阿頭都未必放人,所以無要求到! OH MY GOD, 真係上帝保佑! 但諗深一層, 如果我表現出稍為空閒, 即係早咗走, 佢地可能覺得我得閒咗, 就會提出掉我過去, 天呀~ 玩死我啫! 我個專業試點呀!

我而家基本上星期一至五都要開OT至起碼9點, 返到屋企要一個鐘, 沖涼, 食少少野,就要訓啦, 如果多野做, 星期六都要返工, 如果星期六唔駛返工, 我會訓到自然醒, 通常都中午十二點架啦!

星期日我要上堂, 雖然唔係會計, 但我想堅持,唔想咁易放棄, 我為工作已經放棄咗好多私人時間,唔想連呢個都放棄埋!

各位朋友, 如果你係可以準時放工既一群, 我真係好羨慕你,我都等緊呢一日! 我真係好灰, 唔通呢一世,我都要過咁既生活, 餘下既生命只有休息-工作-再工作????!